На 25 февруари 2026 година, во Конференциската сала на Општина Штип се одржа Action Lab 3 во рамките на програмата URBACT Pioneers Accelerator – Кластер за управување со отпад. Работилницата собра претставници од општинските служби, јавните комунални претпријатија, училиштата и локалните чинители, при што учесниците активно креираа идеи под водство на локалниот URBACT ментор.
Оваа сесија ја означи клучната транзиција од идентификувањето на проблемите кон структурирано дизајнирање и приоритетизирање на решенијата. Работилницата се надоврза на претходните активности, вклучувајќи ги резултатите од анкетите на граѓаните и теренската посета „Urban Safari“, преку која беа лоцирани критичните точки и предизвиците со преполните контејнери.
Учесниците работеа на две клучни прашања:
- Како да користиме податоци во реално време за да ги подобриме рутите за собирање отпад и да ги намалиме преполните контејнери во Штип?
- Како да ги вклучиме граѓаните, училиштата и децата за да изградиме култура на чисти јавни простори?
Преку метод на групно категоризирање и матрица на приоритети, предлозите беа структурирани во пет пакет-интервенции, меѓу кои се издвои Пакетот за паметна пилот-интервенција (комбинација од инфраструктура, локација и организација на услуги), насочен кон поставување паметни контејнери на критични локации и оптимизација на динамиката на празнење.